ВЛАДАТА ГО ОДБЕЛЕЖА ДЕНОТ НА АЛБАНСКАТА АЗБУКА Различностите се нашето богатство

Владата денеска со свечена седница го одбележа Денот на албанската азбука – 22 Ноември, истакнувајќи дека Македонија е дом на различности кои ја збогатуваат заедничката национална приказна.

Премиерот Христијан Мицкоски нагласи дека успехот е заеднички проект и дека само со обединетост, почит и доверба државата може да се движи напред. Тој потсети дека Битолскиот конгрес од 1908 година го поставил темелот на современата албанска азбука – чин со силно историско и европско значење.

Мицкоски истакна дека албанската заедница со својата култура, јазик и традиција е важен дел од државата и дека Владата останува посветена на политики што градат меѓуетничка доверба, развој на јазиците и подобар живот за сите граѓани.

Вицепремиерот Арбен Фетаи порача дека јазикот треба да биде мост, а не граница, и дека јазичната еднаквост е суштински дел од модерната демократија. Тој истакна дека обележувањето на овој ден е потсетник за важноста на стандардираниот јазик во развојот на образованието и институциите.

Денот на албанската азбука се слави како државен празник од 2007 година и е неработен за припадниците на албанската заедница.