ВИСОКО ДРЖАВНО ПРИЗНАНИЕ ЗА САШКО КЕДЕВ – Сиљановска-Давкова го одликува со орден „8 Септември“
Од кабинетот на Сиљановска велат дека признанието е за неговиот придонес во независноста, науката и развојот на демократијата.
Претседателката Гордана Сиљановска-Давкова денеска ќе го одликува Сашко Кедев со Орден „8 Септември“.
Според соопштението од Кабинетот, Кедев го добива високото признание за својот храбар придонес во создавањето на самостојна и независна Република Македонија и за активната улога во развојот на македонската демократија. Одликувањето се доделува и поради неговите извонредни достигнувања во медицината, препознаени на европско и светско ниво, како и членството во престижни меѓународни научни асоцијации.
Во соопштението се истакнува и неговиот углед како врвен интервентен кардиолог кој вовел иновативни техники, извршил повеќе илјади коронарни интервенции и над 1.600 трансрадијални каротидни стентирања. Посебно се потенцираат и неговите научни резултати – 230 трудови индексирани на „Web of Science“, H-индекс 36 и 13.650 цитати – како и придонесот во меѓународната соработка како почесен конзул на Индонезија.
Орденот му се доделува и за неговиот историски алпинистички подвиг: Кедев е првиот Македонец што ги искачил сите 14 светски врвови повисоки од 8.000 метри.