ВАРДАР МАКСИМАЛНО ФОКУСИРАН ВО РАДЕНЦИ – нов тест денес против Рапид Букурешт
Македонскиот фудбалски гигант Вардар, актуелен освојувач на Купот на Македонија, продолжува со интензивни летни подготовки во словенечкото место Раденци, кое веќе се наметнува како нова традиционална база за црвено-црните.
Одличните услови за работа во спортскиот центар им овозможуваат на избраниците на стручниот штаб да се подготват на највисоко ниво за новата сезона, во која клубот има високи амбиции и на домашна и на европска сцена.
Досега Вардар одигра два контролни натпревари во рамки на подготвителниот циклус. Првиот беше против црногорскиот претставник Будуќност од Подгорица, кој „вардарци“ го добија убедливо со 3:0. Вториот тест беше против Олимпија Љубљана, актуелниот шампион на Словенија, во дуел кој понуди цврст ритам и шанса за воигрување на составот.
Следниот предизвик е закажан за денеска од 17:30 часот, кога Вардар ќе ги одмери силите со Рапид Букурешт, еден од стабилните прволигаши во романскиот шампионат. Овој меч ќе биде уште една важна проверка за формата и тактичката дисциплина на тимот, кој покажува видливи знаци на напредок.
Клубот од Скопје во Раденци ќе остане уште неколку дена, по што се очекува враќање во Македонија и продолжување на финалниот дел од подготовките пред стартот на новата сезона. Судејќи по досегашниот пристап и резултати, Вардар сериозно тргнува кон нови успеси.
