ТРОЈЦА СКОПЈАНИ ПРИВЕДЕНИ ЗА ЗАГРОЗУВАЊЕ НА ЖИВОТНАТА СРЕДИНА ВО ВАРДАРИШТЕ – Одреден им е притвор

СВР Скопје во координација со Обвинителството спроведе акција на локацијата Вардариште, каде со години постојат диви отпади. По извршените претреси, поднесени се кривични пријави против тројца скопјани – М.М. (54), А.А. (28) и Ф.А. (41) – поради сомнение за кривично дело „загрозување на животната средина и природата со отпад“ од член 230 став 1 од Кривичниот законик.

Според истрагата, осомничените подолг период до 2 септември 2025 година на улица „Зендел Џемаил“ во Скопје создале диви депонии спротивно на прописите за заштита на животната средина, со што го загрозиле квалитетот на почвата и воздухот, а воедно предизвикале опасност за здравјето на граѓаните.

Тројцата лица вршеле нелегален откуп на старо железо, акумулатори и други метални производи на импровизирани пунктови, без регистрирано правно лице и без дозвола за работа која ја издава Министерството за животна средина.

Судија на претходна постапка им одреди мерка притвор за сите тројца осомничени, кои се префрлени во затворот „Скопје“.