ТРАМП РАЗГЛЕДУВА ВОЕН НАПАД ВРЗ ИРАН – Преферира и дипломатско решение
Се разгледуваат различни воени опции и тоа од ограничени удари до поширока кампања, одлуката се очекува во наредните две недели.
Американскиот претседател Доналд Трамп разгледува можност за ограничен воен удар врз Иран со цел да врши притисок врз Техеран да ги прифати барањата на Вашингтон во врска со нуклеарниот договор, но сепак претпочита дипломатско решение, објави „Волстрит џурнал“, повикувајќи се на извори.
Според извори запознаени со прашањето, потенцијалниот прв удар би бил насочен кон неколку воени или владини објекти и би можел да се изврши во рок од неколку дена. Доколку Иран не ги исполни барањата за прекин на нуклеарното збогатување, САД би можеле да започнат поширока кампања насочена кон објектите на иранскиот режим.
Трамп изјави дека одлуката за следните чекори би можела да се донесе во „следните 10 дена“, а подоцна на новинарите рече дека рокот е најмногу две недели, истакнувајќи дека САД „ќе склучат договор или ќе го добијат на еден или друг начин“. Тој додаде дека разговорите со Иран напредуваат добро, но побара Техеран да прифати „значаен“ договор.
„Во спротивно, ќе се случат лоши работи“, предупреди Трамп, кој постојано се заканува со воена акција.
Официјалните лица наведуваат дека Трамп сè уште не донел конечна одлука за голем воен напад, а му се презентирани различни опции, од ограничени удари до поширока воена кампања. Некои американски функционери и аналитичари предупредуваат дека ваквите потези би можеле да предизвикаат иранска одмазда и да вовлечат САД во поширок конфликт на Блискиот Исток.
На дипломатскиот фронт, американските и иранските функционери овој месец одржаа разговори. САД бараат крај на нуклеарната програма на Техеран, ограничување на програмата за балистички ракети и прекин на поддршката за регионалните вооружени групи, додека Иран негира намера за нуклеарно оружје и одбива сеопфатен договор.
Врховниот лидер на Иран, Али Хамнеи, се закани дека Техеран ќе одговори со максимална сила на секој напад од САД. Во меѓувреме, американските сили продолжуваат да се распоредуваат во регионот, вклучувајќи борбени авиони Ф-35 и Ф-22, дополнителен носач на авиони, авиони за електронско војување, командни авиони и системи за воздушна одбрана.
