ТРАМП ГО САКА ГРЕНЛАНД – Еве како планира да го освои
Трамп го поврзува стекнувањето на островот со конкуренцијата со Русија и Кина.
Државниот секретар Марко Рубио им соопштил на американските пратеници дека претседателот Доналд Трамп сака да го купи Гренланд од Данска, наместо да го освои со војска, објави „Волстрит џурнал“, повикувајќи се на извори запознаени со ситуацијата.
Рубио ги дал забелешките за време на брифинг, откако лидерот на демократите во Сенатот, Чак Шумер, прашал дали Трамп планира да ја користи војската на места како Гренланд и Мексико.
Трамп, кој првично ја изрази намерата да го купи Гренланд за време на својот прв мандат, ја поврза сопственоста на стратешки важниот остров со националната безбедност и конкуренцијата со руската и кинеската морнарица.
„Претседателот Трамп јасно стави до знаење дека стекнувањето на Гренланд е приоритет за националната безбедност на САД и е од витално значење за одвраќање на нашите противници во арктичкиот регион“ – изјави портпаролката на Белата куќа, Каролин Ливит.
Таа додаде дека употребата на војската е „секогаш достапна опција за врховниот командант“.
Европските членки на НАТО објавија соопштение во кое ја поддржуваат Данска и го потврдуваат Гренланд како нејзина самоуправна територија. Полскиот премиер Доналд Туск нагласи дека ниедна членка на НАТО „не треба да напаѓа или да се заканува“ на друга членка, додавајќи дека вооружен конфликт меѓу САД и Данска би ја направил алијансата бесмислена.
Данската премиерка Мете Фредериксен исто така предупреди дека напад на САД врз друга земја од НАТО би значел крај на алијансата:
„Ако САД нападнат друга земја од НАТО, сè ќе престане“, рече таа.
Водечките политички партии во Гренланд долго време се залагаат за независност или поголема автономија од Копенхаген. Исландската пејачка Бјорк, во објава на Инстаграм, ја изрази поддршката за борбата на островот за независност и се надева дека Гренланд би можел да го следи примерот на Исланд, кој се отцепи од Данска во 1944 година.
