ТРАМП ГО МЕНУВА КУРСОТ Најавува офанзива со ракети до Москва
И покрај две рунди директни преговори меѓу Москва и Киев оваа година - на 16 мај и 2 јуни во Истанбул - не е постигнат никаков напредок кон прекин на огнот.
Рускиот претседател Владимир Путин го информирал американскиот претседател Доналд Трамп дека Москва планира значително да ги засили воените операции во источна Украина во наредните 60 дена. Ова го објави порталот Axios на 14 јули, повикувајќи се на неименувани извори запознаени со разговорот што се одржал на почетокот на месецот.
Во телефонскиот разговор на 3 јули, Путин наводно изјавил дека Русија нема намера да застане сè додека не ги освои сите административни граници на украинските региони кои Москва ги анектираше во 2022 година.
„Сака да земе сè“, наводно му рекол Трамп на францускиот претседател Емануел Макрон по разговорот со Путин, според украинскиот портал The Kyiv Independent.
Во моментов, Русија контролира околу 20% од украинската територија, вклучувајќи го поголемиот дел од Луганск, две третини од Донецк, како и делови од Запорожје и Херсон – региони што беа еднострано анектирани по референдуми што не се признати од меѓународната заедница.
На истиот ден, Трамп најави дека ќе испрати дополнителни системи за воздушна одбрана „Патриот“ за Украина. Ако биде реализирано, ова ќе биде првата воена пратка од Трамп која не произлегува од политиките на администрацијата на Џо Бајден.
Иако досега се спротивставуваше на нови буџетски аранжмани за Украина и повикуваше на директни разговори со Путин, новиот бран руски напади и одбивањето на прекин на огнот од страна на Кремљ, очигледно го натерале Трамп да го смени ставот.
САД, според Axios, се подготвуваат за нов пакет воена помош, кој би можел да вклучи и офанзивно оружје, како ракети со долг дострел.
Два извори потврдиле за Axios дека Трамп денеска ќе објави нов и значително поагресивен план за воена помош на Украина, кој за првпат би вклучувал офанзивно оружје.
„Трамп е навистина лут на Путин. Најавата ќе биде мошне агресивна“, изјавил сенаторот Линдзи Греам од Јужна Каролина.
Планот, според изворите, веројатно вклучува ракети со долг дострел кои би можеле да погодат цели длабоко на руска територија, дури и Москва – што претставува драматична промена од досегашниот став на Трамп за избегнување ескалација.
И покрај две рунди директни преговори меѓу Москва и Киев оваа година – на 16 мај и 2 јуни во Истанбул – не е постигнат никаков напредок кон прекин на огнот. Иако дојде до ограничена размена на затвореници, Русија и понатаму останува при своите максималистички барања, што ги блокира дипломатските напори.
