ТЕХНОЛОГИЈАТА И РОДИТЕЛСТВОТО Честото користење на мобилни телефони може да го загрози детскиот развој
Родителите кои редовно користат мобилен телефон или таблет во присуство на своите деца може несвесно да влијаат негативно врз развојот на мозокот и менталното здравје на децата, предупредуваат австралиски научници.
Истражување спроведено врз над 15.000 деца под пет години покажало дека технологијата кај родителите е поврзана со послаба концентрација, потешкотии во планирањето, контрола на емоции и социјално однесување кај децата.
Помалку внимание, повеќе проблеми
Кога родителите се фокусирани на екрани, децата добиваат помалку внимание и помалку можности да учат преку интеракција. Тоа може да предизвика чувство на занемареност, фрустрација и агресивно однесување кај најмладите.
Студијата, објавена во JAMA Pediatrics, открила и зголемен ризик од анксиозност, депресија и импулсивност кај децата чии родители користат уреди за време на игра или оброци – активности клучни за поврзување и развој.
Што можат да направат родителите?
Научниците советуваат родителите свесно да го намалат користењето на екрани кога се со своите деца и да создадат моменти на целосно внимание и поврзаност. Светската здравствена организација препорачува деца под 2 години да не бидат изложени на екрани, а за оние од 2 до 4 години – максимум 1 час дневно.
Ова е прва сеопфатна анализа на темата, но потребни се понатамошни истражувања за да се разбере целосното влијание на технологијата врз родителството и детскиот развој. Сепак, пораката е јасна: вниманието е една од најдрагоцените работи што родителот може да му ја подари на своето дете.
