СТРУШКИОТ ГРАДОНАЧАЛНИК МЕРКО ПРОСЛАВИ 68-МИ РОДЕНДЕН Вработените општинари со честитка и благодарност до него што ги учел на чесна и посветена работа

15 април, 2025 11:22

Денес струшкиот градоначалник Рамиз Мерко полни 68 години. По тој повод Мерко организираше прослава на која присуствуваше целата општинска администрација. За прославата тој напиша на официјалната фејсбук-страница на Општина Струга. Таму се објавени фотографии и видо со коктелот од денешната свеченост.

Тој доби уметничка слика и роденденска торта во форма на бројот 68, колку што прославува годинии на сите им посака да живеат 100 години.

Во честитиката на Општина Струга до Мерко се вели:

„Честитки за 68-от роденден на градоначалникот на Општина Струга, г-дин Рамиз Мерко. На овој посебен ден, администрацијата на Општина Струга му упатува искрени честитки и длабока благодарност на градоначалникот Рамиз Мерко. Во текот на годините јавна служба, господин Мерко покажа стабилно лидерство, бескомпромисна посветеност и висока чувствителност кон потребите на граѓаните и вработените во администрацијата. Хармонијата и меѓусебното разбирање, како и односот изграден врз меѓусебно почитување и отворена комуникација, се доказ за вредностите што ги пренесува во секој чекор од институционалното работење. Високо ја цениме плодната соработка и позитивната атмосфера што ја негува секојдневно во институцијата што ја раководи, мотивирајќи нè за чесна, посветена работа со јасна визија. На овој значаен ден, кој се совпаѓа со уште еден јубилеен датум, му посакуваме на градоначалникот Мерко добро здравје, семејна среќа и континуирани успеси во неговата понатамошна мисија за развој на Општина Струга. Среќен роденден, градоначалниче!“, објави Општина Струга до честитката.

Против Мерко во Основниот суд Струга се водат девет кривични постапки за разни злоупотреби и неправилности во работењето како градоначалник, меѓу кои и за злоупотреба на службената положба при набавката на општинско луксузно „ауди“ од 65.000 евра и за поставување на спомен-плоча. Мерко пред две години беше ставен на „црната листа“ на САД поради сомневања за корупција.