СОСТОЈБАТА НА ПАТИШТАТА УТРОВО МИРНА Возете внимателно поради можни одрони

Сообраќајот на државните патишта утрово се одвива без поголеми проблеми, со умерен интензитет и наместа влажни коловози, информира АМСМ. На граничните премини нема значителни задржувања за влез и излез од државата.

Од АМСМ потсетуваат на потребата од внимателно управување со возилата и почитување на сигнализацијата, особено на делниците низ котлини, речни долини и клисури, каде што постои зголемен ризик од одрони. Критични делници остануваат Катланово – Велес, Маврово – Дебар – Струга, Виница – Берово и Кочани – Делчево.

Патниот правец Охрид – Ресен преку националниот парк Галичица е затворен за сообраќај за сите возила во периодот од 21 ноември 2025 до 31 март 2026 година.

Во сила е и законската обврска за поседување зимска опрема во возилата, која започна на 15 ноември и ќе трае до 15 март, независно од моменталната временска состојба.