СЛУЧАЈ КРАНС-МОНТАНА – Семејствата на жртвите ги нападнаа сопствениците на барот

Семејствата на жртвите од пожарот што се случи на новогодишната ноќ во швајцарскиот ноќен клуб „Ле Констелашн“ во Кранс-Монтана утрово ги нападнаа сопствениците, Жак и Џесика Морети, обвинувајќи ги за смртта на нивните деца.

Двојката пристигна во обвинителството во Сион на четвртиот ден од испрашувањето, каде ги пречекаа десетици роднини и родители на 41 млад човек кој загина во пожарот и 115 повредени. Тие носеа маички со слики од загинатите.

Кога Морети влегоа во зградата за да сведочат, роднините се упатија кон нив, придружувани само од еден полицаец и адвокатите.

„Беше вистинска толпа. Морети скоро и да немаа никаква заштита кога избувна гневот на семејствата“, изјави новинар од местото на настанот.

Разлутените родители ги навредувале и обвинуваале:

„Го убивте мојот син, убивте 40 луѓе, ќе платите за ова!“ Џесика Морети, 40, изгледаше на работ на солзи, додека братот на еден од загинатите се обидел да ја шутне. Мајката на Тристан, Винсенцијан Стаки, рече: „Ниту ќе простиме, ниту ќе заборавиме“.

Жак и Џесика Морети инсистираат дека пожарот го предизвикале вработените и дека излезот за евакуација бил блокиран. Според протечени транскрипти од испрашувањето, тие рекле:

„Не сме ние, туку други“.

Двојката, која е под кривична истрага за убиство од небрежност, предизвикување телесни повреди и пожар од небрежност, особено се фокусира на 24-годишната келнерка Сијан Панин, која исто така загина во пожарот. Тие тврдат дека таа на сопствена иницијатива го користела шампањ-шоуто со прскалки, не забележувајќи ја опасноста од лесно запалива пена на таванот.

Жак Морети изјавил:

„Не ѝ забранив да го прави тоа. Ако мислев дека има најмал ризик, ќе го забранев. За десет години водење на бизнисот, никогаш не помислив дека може да има опасност“.

Доколку бидат обвинети и прогласени за виновни за убиство од небрежност, Морети се соочуваат со казна затвор до 20 години.