СИНДИКАЛНИ ЛИДЕРИ ВО ФУНКЦИОНЕРСКИ ФОТЕЛЈИ – Деановски и Ралповски изненадија со зголемување на платите
Трпе Деановски и Благоја Ралповски ги изненадија сите со нови колективни договори.
Управниот одбор на Фондот за здравствено осигурување (ФЗОМ) донесе одлуки за зголемување на платите на вработените и за отпочнување постапка за избор на нов директор и заменик директор.
Постапката ќе ја води петчлена комисија составена од членови на Управниот одбор: Ирена Петковска, Дритан Даути, Маја Чемерекиќ Велковска, Димитар Димитриевски и Трпе Деаноски. Последниот е претседател на Синдикатот на УПОЗ (вработени во управата, правосудството и здруженија на граѓани) и беше именуван во Управниот одбор од Владата во август 2025 година како претставник на Синдикатот.
Во Управниот одбор на ФЗОМ се и проф. д-р Калина Гривчева Старделова, како претставник на Фармацевтската комора на Македонија, и Бранко Азески, претставник на Сојузот на стопански комори на Македонија.
Покрај тоа, претседателот на Конфедерацијата на слободни синдикати, Благоја Ралповски, пред два месеци беше избран за член на Управниот одбор на Фондот за пензиско и инвалидско осигурување. Владата го именува Ралповски како претставник на репрезентативниот синдикат во Економскиот совет (КСС), со одлука донесена на седница на 3 февруари 2026 година.
Само пет дена подоцна, Трпе Деановски од Синдикатот на УПОЗ и Благоја Ралповски од САДУ постигнаа договор со Владата за потпишување на поединечни колективни договори, со кои вработените во управата и правосудството добија покачување на платите.