СИНДИ КРАФОРД НАПОЛНИ 60 ГОДИНИ – Икона на убавината што не старее

Кога се спомнува Синди Крафорд, повеќето веднаш помислуваат на заводлива темнокоса убавица со совршени пропорции и препознатлива бенка над горната усна,  симбол кој ја направи икона. Тешко е да се поверува дека оваа дива на модната писта, која не изгуби ни трошка од својот шарм низ децениите, денес го одбележува својот 60-ти роденден.

Синди Крафорд е родена во 1966 година и израснала во типично американско семејство, заедно со своите родители и двајца браќа и сестри. Уште од најрана возраст била исклучително активна и се занимавала со спорт, особено тенис и пливање, што подоцна ѝ помогнало да ја задржи витката и атлетска фигура. По завршувањето на средното образование, се запишала на Универзитетот Нортвестерн во Еванстон, каде што студирала бизнис.

Иако академската кариера ветувала стабилна иднина, вистинската страст на Синди била манекенството. За време на студиите ја забележал агент за таленти, по што нејзиниот живот добил сосема нов правец. Кариерата ѝ тргнала во вртоглав подем, а првите значајни кампањи ги добила уште на почетокот на осумдесеттите години, кога имала само 16 години.

Легендарниот пробив на светската сцена се случил со фотосесија за списанието Vogue и рекламна кампања за Pepsi, по што била вивната меѓу најбараните и најплатените супермодели на своето време. Нејзината карактеристична бенка над горната усна брзо станала заштитен знак по кој публиката ширум светот веднаш ја препознава.

Кариерата на Синди Крафорд никогаш не се темелела исклучиво на физичката убавина. Таа беше меѓу првите модели кои своето име го претворија во бренд. Снимаше популарни фитнес-видеа, лансираше сопствена линија козметика и создаде успешна колекција мебел, со што се етаблира како сериозна претприемачка.

Во период кога многу нејзини колеги исчезнуваа од јавната сцена по триесеттите години, Синди умешно го градела својот пат и успеала да остане релевантна, почитувана и влијателна.

Нејзиниот приватен живот исто така бил под лупа на јавноста. На почетокот на 1990-тите години беше во брак со холивудската ѕвезда Ричард Гир, но нивниот брак заврши со развод по четири години. Вистинската животна рамнотежа и среќа ја пронајде со бизнисменот Ренде Гербер, со кого има две деца и со кого и денес живее во хармоничен брак. Нивната ќерка, Каја Гербер, успешно ги следи стапките на својата мајка и веќе е едно од најпрепознатливите имиња во современиот моден свет.

Еден од најтешките моменти во животот на Синди беше убиството на нејзиниот близок пријател, легендарниот моден дизајнер Џани Версаче, кој беше застрелан пред својата вила во Мајами во 1997 година. Овој трагичен настан длабоко ја потресе и ја натера да ги преиспита приоритетите, ставајќи го семејството пред кариерата.

Денес, Синди Крафорд се смета за симбол на природна убавина која созрева со годините. Таа е доказ дека елеганцијата и харизмата не зависат од возраста и дека не мора да се потпираат на естетски интервенции. Сè уште се појавува на насловните страници на списанија и активно е вклучена во хуманитарни иницијативи.

За неа, 60-тиот роденден не означува крај на една ера, туку почеток на ново поглавје исполнето со мудрост, самодоверба и почит која ја стекна и ја ужива низ генерации ширум светот.