ШПАНСКИТЕ МЕДИУМИ ОТКРИВААТ Барселона под истрага за финансиски злоупотреби од милиони евра

Барселона се соочува со сериозни правни проблеми, откако каталонската полиција (Mossos d’Esquadra) откри наводни финансиски неправилности во клубот. Според документи, целта на овие неправилности била да се избегнат повисоки даноци кон државата. Една од клучните точки на истрагата е трансферот на бразилскиот фудбалер Малком, кој се случи во јули 2018 година.

Како што пренесува „Ел Периодико“, полицијата доставила извештај до Истражниот суд број 16 во Барселона, кој ги истражува поранешниот претседател Џозеп Марија Бартомеу и други раководители за наводни финансиски злоупотреби. Според извештајот, клубот исплатил 10 милиони евра на компанијата Bussines Futbol España (BFE) за „посреднички операции“ помеѓу 2018 и 2020 година, кои најверојатно не одговараат на реалните услуги.

Обвинителството тврди дека Бартомеу и неговите соработници, вклучувајќи го поранешниот извршен директор Оскар Грау и поранешниот спортски потпретседател Жорди Местре, донеле одлуки кои ги криеле од Одборот на директори. Тие се обвинети за нелојално управување, а комисионите поврзани со трансферот на Малком се наводно незаконски операции под истрага.

Полицијата исто така забележала значителни промени во работниот договор на Малком по неговото ангажирање. Првично, договорената комисија од 10 милиони евра требало да се исплати во три години, но потоа била променета на 1,5 милиони, со дополнителни 8,4 милиони на BFE. Оваа промена довела до намалување на приходите за државната каса.

Новиот претседател Жоан Лапорта ќе мора да спроведе „превентивна даночна регулација“ за да избегне потенцијални казни. Исто така, истрагата се фокусира и на исплатите на адвокатот Гонзалес Франко, како и на обештетувањето на клубот Лаиета за наводни непријатности поврзани со проектот Espai Barça. Овие откритија дополнително ја комплицираат ситуацијата на клубот, кој се наоѓа во центарот на финансискиот скандал.