СЕ ОГЛАСИ ТРАМ – Иран сака да разговара, премногу е доцна

И покрај растечкиот број жртви и ширењето на конфликтот во регионот, сè уште нема знаци на деескалација. Пораката на американскиот претседател Доналд Трамп дека е „премногу доцна“ дополнително укажува дека во моментов нема простор за дипломатски пресврт.

Трамп изјави дека му рекол на Иран дека е „премногу доцна“ за преговори, во кратка објава на својата социјална мрежа „Truth Social“. Одговарајќи на корисник кој тврдеше дека американските напади довеле до „раѓањето на Трамповата доктрина“, тој напиша:

„Нивната воздушна одбрана, воздухопловните сили, морнарицата и раководството ги нема. Тие сакаат да разговараат. Јас реков: ‘Премногу доцна!’“

Конфликтот меѓу САД, Израел и Иран започна во сабота наутро (по македонско време), кога американските и израелските сили изведоа тешки напади врз ирански воени и безбедносни цели, вклучувајќи локации во и околу Техеран. Иранските државни медиуми потврдија дека врховниот лидер, ајатолахот Али Хамнеи, бил убиен во нападите.

Иран возврати со бран ракетни и беспилотни напади врз Израел и американските бази, како и врз енергетската инфраструктура во земјите од Персискиот Залив. Нападите погодиле цели и во Саудиска Арабија, ОАЕ и Бахреин, а сообраќајот низ Ормутскиот теснец бил нарушен.

Вашингтон објави дека целта на операцијата е уништување на ракетните капацитети на Иран и спречување на Техеран да развива нуклеарно оружје. Иранските власти, пак, ги обвинуваат САД и Израел за дестабилизација на регионот.

И покрај растечкиот број жртви и проширувањето на конфликтот, сè уште нема знаци за деескалација. Пораката на Трамп дека е „премногу доцна“ дополнително ја потврдува оваа реалност.

Амбасадорот на Иран во Обединетите нации во Женева, Али Бахреини, изрази сомнежи околу можноста за разговори со САД, три дена откако започнаа заедничките напади.

„Засега сме многу скептични во врска со корисноста на преговорите“, изјави Бахреини за новинарите.