САД ЗАПЛЕНИЈА РУСКИ ТАНКЕР ПОЛН СО НАФТА – Русија бара почитување на меѓународното право
Американските сили извршија операција за запленување на рускиот танкер „Маринера“ во Северниот Атлантик.
Министерството за внатрешна безбедност на Соединетите Американски Држави, со поддршка на американската армија, изврши операција за запленување на рускиот танкер за нафта „Маринера“ (порано „Бела 1“) во Северниот Атлантик. Службите за спроведување на законот на САД моментално се на бродот, а акцијата ја координира Министерството за внатрешна безбедност, заедно со Пентагон и Министерството за правда.
Според прелиминарните информации, немало размена на оган или употреба на оружје за време на влегувањето на бродот. Американските претставници нагласуваат дека информациите сè уште се проверуваат, но засега нема индикации за истрели.
Операцијата е резултат на повеќенеделно следење на танкерот од страна на крајбрежната стража на САД, која го следела бродот од водите покрај Венецуела.
Танкерот „Маринера“ е еден од неколкуте санкционирани бродови за нафта што работат во близина на Венецуела и неодамна беше регистриран под руско знаме. Оваа акција е дел од зголемениот притисок на Вашингтон врз бродовите поврзани со Венецуела и режимите под санкции.
САД веќе запленија два танкери минатиот месец, како дел од блокадата на санкционираните пратки на нафта до и од Венецуела. Операцијата доведе до тензија меѓу Вашингтон и Москва, при што Кремљ го критикува „несразмерното внимание“ на САД кон танкерот.
Русија распореди подморница и други поморски средства за следење на танкерот „Маринера“. Според американски извори, бродот се обидувал да ја избегне блокадата на САД, но не успеал да се закотви и товари нафта.
Рускиот Министерство за надворешни работи соопшти дека танкерот се наоѓа во меѓународни води и постапува согласно меѓународното поморско право. Русија очекува западните земји, кои јавно се залагаат за слобода на пловидба, да го применуваат овој принцип доследно.
