РУТЕ НЕ ЈА УПРАВУВА НАТО – Неговите активности се сведуваат на зачувување на Алијансата

Европското издание на „Политико“ пишува дека работата на генералниот секретар на НАТО, Марк Руте, во сегашната ситуација повеќе се сведува на зачувување на интегритетот на Алијансата и спречување на политички раскол, предизвикан од политиката на американскиот претседател Доналд Трамп, отколку на директно управување со организацијата.

Според весникот, значаен дел од активностите на Руте се насочени кон одржување на дијалог со американскиот претседател и намалување на ризиците што би можеле да ја доведат во прашање иднината на Северноатлантската алијанса. Улогата на генералниот секретар сè повеќе се сведе на обиди за спречување поткопување на темелите на НАТО.

Во европските дипломатски кругови Руте е наречен „Тефлон“ поради способноста да излезе од сложени и чувствителни ситуации без сериозни последици. Сепак, сегашните околности ја прават неговата позиција особено тешка, бидејќи тој мора да балансира помеѓу интересите на сојузниците, избегнувајќи директни конфликти и остра реторика.

Висок дипломат на Европската Унија изјави дека набљудувањето на овие напори е исклучително тешко и дека целосно ја разбира сложеноста на неговата работа при зачувувањето на единството на НАТО. Поранешниот постојан претставник на Шпанија во НАТО, а сега член на Европскиот парламент, Николас Пасквал де ла Парте, оцени дека одржувањето на кохезијата на алијансата во овие услови е „потешко отколку одење по јаже на силен ветер“.