РАСТ НА ИЗВОЗОТ И УВОЗОТ Надворешнотрговската размена бележи пораст до ноември 2025 година
Надворешнотрговската размена на Република Македонија продолжува да бележи пораст и во периодот јануари – ноември 2025 година, покажуваат најновите претходни податоци. Во споредба со истиот период од 2024 година, зголемени се и извозот и увозот на стоки, што укажува на засилена економска активност и поголема вклученост на домашната економија во меѓународната трговија.
Вкупната вредност на извезената стока во периодот јануари – ноември 2025 година изнесува 455,5 милијарди денари, што претставува пораст од 2,6 проценти во однос на истиот период лани. Изразено во странска валута, извозот достигнал 7,4 милијарди евра, односно 8,3 милијарди американски долари, при што растот во долари е значително повисок и изнесува 6,4 проценти.
Во истиот период, вредноста на увезената стока достигнала 647,3 милијарди денари, што е зголемување од 3,9 проценти во споредба со јануари – ноември 2024 година. Увозот во евра изнесува 10,5 милијарди, додека во американски долари 11,8 милијарди, со раст од 3,8, односно 7,7 проценти.
Според вкупниот обем на надворешнотрговската размена, во периодот јануари – ноември 2025 година, најмногу се тргувало со Германија, Велика Британија, Кина, Грција и Србија, кои заедно учествуваат со 47,7 проценти во вкупната размена.
Земјите членки на Европската Унија остануваат најважни партнери, со учество од 59,3 проценти во вкупниот обем на надворешнотрговската размена на државата.
