ПУТИН ВО ВРСКА СО НОВИТЕ САНКЦИИ НА САД Тие се сериозни, но нема значително да влијаат на економијата
Санкциите, првите од враќањето на Доналд Трамп на функцијата американски претседател, беа воведени во средата и вклучуваат ограничувања за работењето и меѓународните трансакции на двете компании.
Рускиот претседател Владимир Путин изјави дека најновите санкции на САД насочени кон двете најголеми руски нафтени компании – „Роснефт“ и „Лукоил“ – се „сериозни“, но недоволно силни за да имаат големо влијание врз економијата, пренесе Москва тајмс.
„Тие се, секако, сериозни за нас, тоа е јасно. Ќе имаат одредени последици, но нема значително да влијаат на нашата економска благосостојба“, рече Путин на прес-конференција, додавајќи дека мерките претставуваат „непријателски чин“ кој не помага во обновувањето на односите меѓу Москва и Вашингтон.
Руското Министерство за надворешни работи предупреди дека потегот би можел да ги загрози дипломатските напори за прекин на војната во Украина, нагласувајќи дека Русија развила „силен имунитет“ на санкции од ваков тип.
Трамп, кој во почетокот на својот мандат настојуваше да ги подобри односите со Москва, наводно станал сè пофрустриран од одбивањето на Путин да прифати прекин на огнот, а воведувањето на санкциите доаѓа откако пропадна планот за нов самит во Будимпешта.