ПРВ НЕУСПЕХ НА ЛИВЕРПУЛ Кристал Палас го освои англискиот суперкуп

Екипата на Кристал Палас е новиот освојувач на англискиот Комјунити Шилд, откако попладнево во драматичен натпревар го совлада првакот Ливерпул по изведување на пенали. Регуларниот дел заврши 2:2, а по пеналите „орлите“ славеа со 3:2.

Ова е втор трофеј за Кристал Палас во краток период, откако во мај го освоија и ФА Купот.

Ливерпул двапати беше во водство – прво со гол на новото засилување Уго Екитике во 4. минута, а потоа и со погодок на Џереми Фримпонг во 21. минута. За Палас, Жан-Филип Матета израмни од пенал во 17. минута, а Исмаила Сар во 77. минута донесе 2:2 и пенал-рулет.

Во драмата од 11 метри, голманот на Кристал Палас, Дин Хендерсон, одбрани два удари, а Мохамед Салах промаши целосно. Решавачкиот пенал во петтата серија го реализираше Џастин Девени, обезбедувајќи историски прв трофеј за Палас во ова натпреварување.

Ливерпул останува со 16 освоени Комјунити Шилд трофеи.