ПРИМИРЈЕ СО ГАРАНЦИИ – Западот планира да ја обезбеди Украина по војната

„Коалицијата на подготвените“ има намера активно да учествува во предложениот механизам за следење и верификација на прекинот на огнот во Украина, кој ќе биде предводен од Соединетите Американски Држави. Ова се наведува во документот усвоен по состанокот на коалицијата одржан во Париз, објавен на веб-страницата на Елисејската палата.

Според документот, ќе биде воспоставен континуиран, сигурен и транспарентен систем за мониторинг на прекинот на огнот, во кој ќе учествуваат членките на „коалицијата на подготвените“. Коалицијата ќе има свои претставници и во Специјалната комисија задолжена за истрага на евентуални прекршувања, утврдување одговорност и предлагање мерки за нивно надминување.

Дополнително, договорено е формирање координативен механизам меѓу САД, Украина и „коалицијата на подготвените“. Во таа насока, ќе биде воспоставена заедничка координативна ќелија САД-Украина-Коалиција, која ќе функционира во рамките на оперативниот штаб на коалицијата во Париз.

По состанокот, британскиот премиер Кир Стармер изјави дека лидерите на таканаречената „Коалиција на волјата“ потпишале декларација за намера за распоредување трупи во Украина, доколку се постигне мировен договор.

„Денес потпишавме декларација за намера да распоредиме трупи во Украина во случај на мировен договор. Ова е важен дел од нашата долгорочна и силна посветеност кон Украина“, изјави Стармер.

Тој додаде дека декларацијата отвора пат за воспоставување правна рамка во која вооружените сили на Велика Британија, Франција и партнерските земји ќе можат да дејствуваат на украинска територија, со цел обезбедување на безбедноста на украинското небо и море и обнова на украинските вооружени сили.

Стармер истакна дека по евентуален прекин на огнот, Велика Британија и Франција ќе воспостават воени бази низ Украина и ќе изградат безбедни складишта за оружје и воена опрема, наменети за одбранбените потреби на земјата. Тој додаде дека коалицијата се согласила и за долгорочна испорака на одбранбено оружје, како и за заедничка поддршка на Украина во случај на нов вооружен напад од Русија.

Специјалниот претставник на американскиот претседател, Стив Виткоф, оцени дека по состанокот на „коалицијата на добронамерните“ е постигнат значителен напредок во однос на безбедносните гаранции за Украина и нејзиниот иден развој.

„Работата на безбедносните протоколи е во голема мера завршена. Кога ќе бидат финализирани, тие ќе бидат трајни“, изјави Виткоф.

Тој нагласува дека протоколите имаат за цел да спречат нови напади врз Украина, а во случај на такви напади да овозможат ефикасна одбрана. Тој ги опиша безбедносните гаранции како „најсилни можни“.

Американската делегација во Париз одржа средби со претставници на коалицијата и на украинските власти, а Виткоф најави дека преговорите со украинската делегација ќе продолжат и во наредните денови. Тој, исто така, откри дека САД водат разговори со инвестициската компанија „Блекрок“ за вложувања во економскиот развој на Украина.

Францускиот претседател Емануел Макрон потврди дека САД и „коалицијата на добронамерните“ постигнале договор за воспоставување механизам за следење на прекинот на огнот под американско водство, со учество на повеќе држави. Според него, западните земји ветиле долгорочна поддршка за украинската армија, која, по завршувањето на конфликтот, би можела да брои до 700.000 припадници.

Германскиот канцелар Фридрих Мерц изјави дека Германија е подготвена да придонесе политички, финансиски и воено за одржување на евентуално примирје. Тој посочи дека тоа би можело да вклучува и распоредување сили на територијата на НАТО која граничи со Украина, со цел поддршка по постигнување примирје, додавајќи дека конечната одлука ќе ја донесат германската влада и Бундестагот.

Во меѓувреме, по средбата со американскиот претседател Доналд Трамп во Мар-а-Лаго, украинскиот претседател Владимир Зеленски изјави дека безбедносните гаранции меѓу САД и Украина се целосно договорени. По билатералните разговори, Трамп и Зеленски одржаа и телефонски разговор со европските лидери, при што Трамп претходно оцени дека разговорите биле „добри и многу продуктивни“.