ПРЕТСЕДАТЕЛКАТА НА ЕК НАЈАВИ ШЕСТ МИЛИЈАРДИ ПОМОШ ЗА УКРАИНА Путин погрешно пресметал ако мисли дека Русија ќе победи

Претседателката на Европската комисија, Урсула фон дер Лајен, најави исплата од речиси шест милијарди евра за Украина преку програмата за Економски и финансиски реформи (ЕРА) и Украинскиот механизам, нагласувајќи дека за траен мир е потребна силна и независна Украина.

Таа порача дека Путин погрешно пресметал ако мисли дека Русија ќе победи, и дека ЕУ мора да продолжи да ги зголемува трошоците за војната за Русија. Фон дер Лајен ги поздрави напорите на европските лидери за користење на замрзнатите руски средства за финансирање на Украина, при што ја истакна третата опција – „Заем за репарација“ – како најделотворна.

Во однос на економијата и животната средина, Фон дер Лајен нагласи дека декарбонизацијата и конкурентноста можат да одат „рака под рака“, со принципот: „Ако загадуваш – плаќаш, ако не сакаш да плаќаш – иновирај“. Таа посочи дека обновливите извори на енергија значително придонеле за намалување на емисиите и цените на енергијата.

Во насока на зголемување на конкурентноста, ЕУ ја спроведува иницијативата „Избери ја Европа“, го зголемува Фондот за иновации, ја унапредува стратегијата „Вештачка интелигенција на прво место“ и поддржува изградба на гигафабрики и иновативни компании.