ПРЕСВРТ ВО ДОНБАС Украина прифати демилитаризирана зона
Киев го прифати воспоставувањето демилитаризирана зона, дел од територијата останува под руска окупација.
Украинскиот преговарач Михајло Подољак денес потврди дека Киев прифатил воспоставување на демилитаризирана зона во Донбас, како клучен елемент во преговорите со САД и Русија.
Во изјава за францускиот „Le Monde“, Подољак истакна дека е потребно прецизно да се дефинира обемот на повлекување на оружјето и улогата на меѓународните мисии.
„Ова е логичен формат за завршување на конфликтот, со болниот факт дека дел од територијата ќе остане под де факто руска окупација“, рече Подољак.
Трети страни ќе го следат договорот, ќе го надгледуваат движењето на трупите и ќе ја почитуваат линијата на разделување. Предлогот, поддржан од украинскиот претседател Володимир Зеленски, предвидува повлекување на украинските и руските сили од сегашната фронтова линија. Моделот се потпира делумно на искуството на демилитаризираната зона меѓу Северна и Јужна Кореја.
Според украинската верзија, демилитаризираната зона би ги опфатила двете страни од линијата на поделба во Донбас и ќе биде под меѓународен надзор, со евентуално учество на САД за спречување на понатамошна руска агресија.
Зеленски потенцираше дека Украина нема ниту „правен“, ниту „морален“ мандат да се откаже од својата територија и дека секое решение ќе мора да биде потврдено преку избори или референдум.
Документот доставен до САД се состои од три делови: крај на војната, повоена европска безбедносна архитектура и реконструкција на Украина. Подољак истакна дека Русија треба финансиски да учествува во реконструкцијата за да се обезбеди долгорочно одвраќање.
Предлогот е дел од ревидираниот американски мировен план, кој Зеленски го достави до американскиот претседател Доналд Трамп, со учество на францускиот претседател Емануел Макрон, британскиот премиер Кир Стармер и германскиот канцелар Фридрих Мерц.
