ПРЕМИЕРОТ МИЦКОСКИ Владата постојано го зголемува стандардот на граѓаните преку повисоки плати

Премиерот и претседател на ВМРО-ДПМНЕ истакна дека Владата останува цврсто посветена на подобрување на животниот стандард на граѓаните преку континуирано зголемување на платите и инвестиции во клучните сектори – образованието и здравството.

Тој нагласува дека зголемувањето на платите во овие сектори се спроведува според веќе потпишаните четиригодишни договори со репрезентативните синдикати.

„Зголемувањето на платите во здравството и образованието се реализира како резултат на договорите што ги имаме потпишано со синдикатите. За образованието, во периодот 2025–2027 година, платите ќе се зголемуваат за 7,5% до 10%, во зависност од капацитетот на буџетот, а во 2028 година зголемувањето ќе изнесува меѓу 10% и 12,5%“, изјави Мицкоски.

Тој потсети дека оваа година платите беа зголемени и за припадниците на Министерството за внатрешни работи и Министерството за одбрана, што според него е јасен показател за системски пристап кон унапредување на јавните плати.

„Слична формула имаме и со репрезентативните синдикати во здравството. Годинава зголемување добија и вработените во МВР и Армијата. Се грижиме за стандардот на граѓаните и на вработените во рамките на нашите можности, а ова ќе продолжи и во иднина, поддржано со активен социјален дијалог помеѓу работниците и работодавачите“, додаде Мицкоски.