ПРЕГОВОРИ КОИ МОЖАТ ДА ЈА ЗАПРАТ ВОЈНАТА – Исламабад станува центар на светската дипломатија

Додека континуираните израелски напади врз Либан го ставаат на тест кревкото примирје на Блискиот Исток, се најавува нов дипломатски обид за смирување на тензиите: американска делегација треба да се сретне со ирански претставници во Исламабад, главниот град на Пакистан, на разговори во сабота.

Пакистан ја презеде улогата на посредник, откако претходно помогна во постигнувањето на двонеделно примирје меѓу Вашингтон и Техеран. Сепак, и покрај тоа што договорот формално е во сила, двете страни сè уште имаат длабоки разлики околу условите за долгорочен мировен договор, а сомнежите за неговата одржливост се зголемуваат.

Во пресрет на разговорите, безбедносната состојба во Исламабад е значително засилена, со распоредени над 10.000 припадници на безбедносните сили, поради страв од можни инциденти.

Според најавите, американската делегација ќе ја предводи потпретседателот на САД Џ.Д. Венс, а во неа ќе учествуваат и специјалниот претставник на претседателот Доналд Трамп, Стив Виткоф, како и Џаред Кушнер. Од иранска страна, како можен водечки претставник се споменува претседателот на парламентот Мохамед Багер Галибаф, заедно со министерот за надворешни работи Абас Арагчи.

Клучните теми на разговорите се иранската нуклеарна програма и збогатувањето ураниум, како и прашањето за Ормутскиот теснец. Техеран, пак, бара гаранции за траен прекин на непријателствата и пошироки безбедносни гаранции во регионот.

Во меѓувреме, Иран предложи документ од 10 точки со свои услови, меѓу кои задржување контрола врз Ормутскиот теснец, повлекување на американските воени сили од регионалните бази и прекин на израелските напади врз групи како Хезболах во Либан.

Од друга страна денеска повторно се огласи американскиот претседател Доналд Трамп кој изјави дека ќе се знае за 24 часа дали преговорите меѓу Соединетите Американски Држави и Иран, кои се одржуваат во Пакистан овој викенд, ќе бидат успешни.