ПОЖАРИТЕ И НАТАМУ БЕСНЕАТ Активни огништа остануваат на неколку критични локации низ државата

Вкупно 51 пожар на отворено биле регистрирани во текот на изминатото деноноќие ширум Македонија, соопшти утрово Центарот за управување со кризи (ЦУК). Од нив, осум пожари се сè уште активни, седум се ставени под контрола, а дури 36 се целосно изгаснати.

Под контрола се пожарите во општина Македонски Брод, во близина на селата Грешница и Латово, како и во општина Карбинци кај селото Јунузлија и во Петровец кај Средно Коњаре, на потегот покрај реката Пчиња. Интервентните тимови и локалното население реагираа навремено за да го спречат нивното проширување.

Најкритичните точки, каде што пожарите сè уште се активни, се:

• кај селото Бешиште во Прилеп, со разгорување кон Градешница и кон границата со Грција;
• меѓу селата Царевиќ, Смолани, Радобил, Дрен, Галиште и Трстеник, на границата меѓу Прилеп и Кавадарци;
• кај Горно Црско во Кичево;
• меѓу селата Церово и Групчин во Желино;
• тромеѓето меѓу Василево, Радовиш и Берово, каде што се шири пожар на планината Голем Готен и Малешевските планини кај селото Нивичино;
• кај селото Нерав во Крива Паланка;
• и кај селото Косевица во Македонска Каменица.

Во меѓувреме, успешно изгаснати се 36 пожари во различни општини низ земјата, вклучително Шуто Оризари, Арачиново, Сарај, Зелениково, Битола, Прилеп, Долнени, Кривогаштани, Струмица, Василево, Гевгелија, Охрид, Струга, Кичево, Велес, Свети Николе, Пробиштип, Куманово, Липково, Брвеница, Боговиње, Гостивар и Врапчиште.

Надлежните служби остануваат на терен и апелираат до граѓаните за крајна внимателност, особено во руралните и шумските подрачја, каде што постои висок ризик од повторна појава или ширење на пожари.