ПОСЕН ДЕН, СЛАДОК ЖИВОТ – Обичаите на утрешниот Младенци
Спомен на светите четириесет Севастиски маченици од 320 година.
Утре православните верници ќе го прослават празникот Младенци, кој се одбележува во спомен на страдањата на светите четириесет Севастиски маченици од 320 година. Празникот го симболизира пролетта, младоста, љубовта и верноста на младите брачни парови.
На овој ден младите сопружници примаат гости во својот дом, кои носат подароци за поддршка на новиот заеднички живот. Домаќинките ги покажуваат своите умешности, а сите јадења се посни, бидејќи празникот секогаш се паѓа за време на Велигденските пости.
Најпознат обичај е жените да месат младенчиња, колачиња од пченично брашно, премачкани со мед, кои се нудат на гостите и симболизираат среќен и долг брачен живот.
Црквата преку овој празник ги потсетува сопружниците дека љубовта и верноста треба да останат силни и непоколебливи, како што мачениците останале верни на Христос до последниот здив.
