ПОЛИЦИЈАТА АЛАРМИРА Лажни службеници измамуваат граѓани преку телефон

Во последно време, СВР Велес регистрира зголемен број на пријави од граѓани, особено од повозрасни лица, кои станале жртви на телефонски измами. Непознати лица се јавуваат на телефон, претставувајќи се како службеници, и се обидуваат да изнудат поголеми суми на пари под различни изговори. Според информациите од СВР Велес, измамниците тврдат дека им се потребни финансиски средства за ослободување на нивни блиски, кои наводно биле инволвирани во сообраќајни несреќи.

Во текот на последното деноноќие, полицијата примила пет пријави за обиди за измама. Во светло на овие настани, од СВР Велес апелираат до граѓаните да бидат особено внимателни при примањето на телефонски повици од непознати броеви. Тие советуваат да не се даваат пари, а во случај на сомнеж, веднаш да се прекине разговорот и да се пријави инцидентот во најблиската полициска станица.

Со цел да ги заштитат граѓаните од ваквите измами, полициските службеници од Отсекот за превенција при СВР Велес активно работат на едукација на населението. Оваа едукација се спроведува преку непосредни разговори и дистрибуција на едукативни материјали со корисни совети за заштита. Превентивните активности ќе продолжат и во иднина, со посебен акцент на средби со повозрасната популација.