ПО АПСЕЊЕТО НА ПРИНЦОТ ЕНДРУ – Премиерот Стармер истакнува дека сите се еднакви пред законот

Британскиот премиер Кир Стармер изјави дека поранешниот принц Ендру Маунтбатен-Виндзор треба да соработува со властите во Велика Британија и САД поради скандалот со осудениот сексуален престапник Џефри Епштајн, нагласувајќи дека „никој не е над законот“.

Во интервју за Би-Би-Си, Стармер рече дека секој кој има информации поврзани со случајот има обврска да ги достави на властите:

„Секој што има какви било информации треба да сведочи. Без разлика дали е Ендру или некој друг, секој со релевантни информации треба да контактира со надлежниот орган.“

Тој додаде дека ова правило важи не само за случајот Епштајн, туку и за сите други случаи на насилство врз жени и девојчиња.

Стармер потсети дека еден од основните принципи на британскиот правен систем е дека сите се еднакви пред законот:

„Никој не е над законот. Тоа е долгогодишен и многу важен принцип на нашето општество и мора да се примени на истиот начин во овој случај како и во секој друг.“

Ендру Маунтбатен-Виндзор беше уапсен денес на својот имот Вуд Фарм во Сандрингам, токму на својот 66-ти роденден, под сомнение за злоупотреба на јавна функција, објавија британските медиуми.