ОТКРИТИЕ ВО ВЕЛИКА БРИТАНИЈА Клетките на рак на дебелото црево се преправуваат во кожни и мускулни

Научници од Центарот за истражување на ракот во Велика Британија, Шкотска и Универзитетот во Единбург направија значајно откритие кое може да го промени пристапот кон лекувањето на рак на дебелото црево. Според нивното истражување, клетките на овој тип рак имаат способност да го променат својот облик и идентитет, трансформирајќи се во клетки слични на оние на кожата или мускулите, што им овозможува поагресивно ширење низ телото.

Овој процес, познат како клеточна пластичност, се случува кога клетките го губат својот оригинален идентитет и попримаат својства на други видови клетки. Истражувачите откриле дека токму оваа способност е клучна за ширењето на агресивните форми на рак на дебелото црево, особено во метастази во органи како црниот дроб, лимфните јазли и дијафрагмата.

„Со оглед на сè поголемиот број млади лица кои добиваат дијагноза рак на дебелото црево, особено жени во Шкотска и Англија, од витално значење е да разбереме како оваа болест се развива“, истакна д-р Кевин Мјант од Институтот за генетика и рак при Универзитетот во Единбург. „Нашето истражување покажува дека ракот може да се шири преку ‘промена на обликот’, при што клетките попримаат форма на кожни или мускулни клетки, наместо да останат како клетки на дебелото црево.“

Во студијата е утврдено дека губењето на генот „Атрх“ има клучна улога во овој процес. Без него, раковите клетки поуспешно се маскираат и се шират во други делови од телото, што значително ја отежнува борбата со болеста.

Ракот на дебелото црево е втора водечка причина за смрт од рак во Велика Британија, со 16.800 загубени животи годишно. Од особена загриженост е зголемениот број случаи кај младите, на возраст од 25 до 49 години.

Ова откритие, според научниците, отвора нови можности за развој на таргетирани терапии кои ќе го спречат или забават процесот на трансформација на клетките, со што потенцијално би се ограничило ширењето на болеста.