ОСТРОВОТ ХАРГ – Срцето на иранскиот извоз на нафта

Островот Харг има клучна улога во иранската економија, бидејќи речиси целокупниот извоз на сурова нафта на земјата минува преку него. Секој напад врз енергетската инфраструктура на островот може да предизвика сериозни последици за глобалниот пазар на нафта, кој веќе се наоѓа во криза.

На островот, кој се наоѓа во северниот дел на Персискиот Залив и е долг околу осум километри со ширина од четири до пет километри, е развиена значајна инфраструктура. Таму се сместени резервоари за складирање, нафтоводи и терминали за товарење нафта на море. Нафтоводите од најголемите ирански нафтени полиња го доведуваат суровото гориво до островот, од каде се натовара на танкери за извоз, главно кон Кина и други азиски пазари.

Терминалите на Харг можат да обработуваат од 1,3 до 1,6 милиони барели нафта дневно, благодарение на длабоките води кои овозможуваат закотвување на најголемите танкери. Пред неодамнешната ескалација во регионот, Иран го зголеми извозот од островот на речиси рекордни нивоа, помеѓу 15 и 20 февруари, испораките достигнаа над три милиони барели дневно, што укажува на подготовка за можни прекини.

Минатата недела, САД и Израел објавија дека таргетирале воени објекти на островот. Во социјалните медиуми, Доналд Трамп изјави дека САД „целосно ги уништиле“ воените цели на Харг.

Аналитичарите предупредуваат дека напад врз извозните терминали би можел да отстрани 1,5 до 2 милиони барели нафта дневно од светскиот пазар и околу три до четири проценти од глобалната морска трговија со сурова нафта.

Откако започна конфликтот, цените на суровата нафта Брент пораснаа за 42 проценти, додека WTI забележа раст од 47 проценти, според Еуроњуз.