ОРБАН УДРИ ПО БРИСЕЛ – Нема да поминете

Унгарскиот премиер Виктор Орбан изјави дека Брисел се оддалечува од идејата за Европа составена од суверени држави и се обидува да изгради „централизирана империја“. Во објава на социјалната мрежа X, Орбан порача дека Унгарија нема да ги прифати таквите, како што ги нарече, скандалозни планови на Европската Унија.

„Ги отфрламе нивните Соединети Европски Држави и ќе продолжиме да ги ставаме интересите на Унгарците на прво место“, напиша Орбан.

Според него, централизираниот систем во ЕУ води кон намалување на поддршката за локалните земјоделци, затворање на малите бизниси, отсуство на пониски цени на комуналните услуги и зголемување на влијанието на странските транснационални корпорации.

Унгарија често влегува во судир со одлуките на Европската Унија, особено кога станува збор за помошта за Украина. Еден ден претходно, Орбан остро ги критикуваше изјавите на генералниот секретар на НАТО, Марк Руте, поврзани со можноста за задолжително присуство на трупи на Алијансата во Украина веднаш по склучувањето мировен договор со Русија.

Според унгарскиот премиер, Европа се доближува до директен конфликт, а настани што ја ескалираат ситуацијата се случуваат речиси секоја недела. Тој претходно ги опиша плановите на Руте за испраќање војници во Украина како „лудило“.