ОРБАН ПРЕДУПРЕДУВА – Европа е на работ на војна

Унгарскиот премиер Виктор Орбан изјави дека актуелната геополитичка ситуација претставува сериозен ризик и дека Европа се соочува со зголемена опасност од конфликт. Тој оцени дека „се повторуваат одредени знаци од периодот пред Првата светска војна“, пренесе МТИ.

Според Орбан, европските граѓани треба јасно да ги изразат своите ставови, бидејќи, како што рече, во спротивно европските лидери може да ги донесат државите во директна конфронтација. Тој нагласи дека унгарската влада своите позиции ги гради исклучиво врз основа на националните интереси, дури и кога тие не се поклопуваат со ставовите на другите земји.

Орбан дополнително потенцираше потреба од „искрени и длабоки разговори“, посочувајќи дека медиумите финансирани од странство, според него, немаат независна позиција. Тој додаде дека постојат многу граѓани од различни политички убедувања кои ја споделуваат заложбата за мир.

Министерот за надворешни работи Петер Сијарто порача дека поддршката треба да биде насочена кон заштита на интересите на унгарските граѓани, а не кон политички партии.

Во однос на војната во Украина, Орбан оцени дека ниту Москва ниту Киев моментално не се подготвени за мировни разговори, и дека за напредок е неопходна ангажираност од страна на големите светски сили. Тој изјави дека Украина во голема мера зависи од западната помош и дека не располага со целосна самостојност.

Премиерот ги повика младите да ги разбираат политичките и културните разлики, но да се стремат кон внатрешна стабилност и мир, бидејќи, како што рече, „луѓето кои имаат внатрешен мир ретко започнуваат војни“.