ОБВИНУВАЊА ОД АРСОВСКА Ганиу нелегално легализирал згради со по 50 станови

Градоначалничката на Град Скопје, Данела Арсовска, обвини дека во општина Чаир, наводно, биле легализирани згради со фалсификувани документи, при што некои од нив содржат и до 50 станови. Таа тврди дека градоначалникот на Чаир, Висар Ганиу, ја злоупотребил постапката за легализација и прекршил законски процедури.

„На 20 март 2025 година, Ганиу незаконски легализирал згради од по 50 станови со фалсификувана документација. Додека обични граѓани со години не можат да легализираат ни гаражи и тераси од 20 квадрати, институциите молчат за овој случај,“ изјави Арсовска преку објава на социјалните мрежи, при што сподели и видео од нејзино гостување.

Таа нагласува дека Ганиу веќе неколку пати бил одбиен во обидите да легализира вкупно 150 објекти, бидејќи немал соодветна документација и објектите не ги исполнувале условите за легализација.

„Пред три години му беа испратени јасни инструкции – или да обезбеди законска документација, или да се урнат нелегално изградените објекти. Наместо тоа, се поднесувале фалсификувани документи во Катастар,“ рече Арсовска.

Според неа, по зголемените инциденти и запалени возила во Чаир, Ганиу вршел притисок за добивање легални документи за спорните објекти.

„Не можам за секоја зграда поединечно да излегувам во јавност. Треба системот да функционира, а не преку притисоци и фалсификати,“ додаде таа.

Од општина Чаир засега нема официјална реакција на обвинувањата.