ОДБАРАНАТА НА ДОДИК Нема основа за кривично гонење, Шмит неовластен

Адвокатот на претседателот на Република Српска, Милорад Додик, Горан Бубиќ, денеска побара од Апелацискиот совет поништување на првостепената пресуда и нејзино преиначување во ослободителна, или евентуално ново судење. Тој предложи и ангажирање на советодавно мислење од вонуставниот советодавен суд на Европската унија во БиХ.

Бубиќ во своето обраќање пред Апелацискиот совет истакна дека жалбата се повикува на принципот на законитост, наведувајќи дека од 7 јули 2023 година, кога бил потпишан спорниот указ, во Кривичниот законик на БиХ не постои кривично дело кое се однесува на непочитување на одлуки.

Тој нагласи дека Кривичниот законик на БиХ бил изменет дури 16 пати, при што ниту една од тие измени не вклучувала официјално објавување на одлуката на високиот претставник Кристијан Шмит во „Службен весник“. Според него, ниту еден доказ во првостепената постапка не потврдил дека таа одлука била објавена дури ни на официјалната веб-страница на ОХР.

„Обвинителството никогаш не достави доказ дека одлуката на Шмит е јавно објавена, што е клучно за нејзината правна сила“, рече Бубиќ.

Без да навлегува во легитимноста на Шмит, одбраната останува на ставот дека на денот кога бил потпишан указот од страна на Додик, не постоела правна основа според Кривичниот законик за вакво гонење.

Бубиќ предложи Апелацискиот совет да побара советодавна поддршка од европските институции за да се утврди дали одлуката на Шмит имала правно дејство на денот на потпишувањето на указот.

Тој, исто така, ја оспори правната рамноправност во БиХ, укажувајќи дека закони донесени на државно ниво не смеат да бидат во спротивност со уставите на ентитетите.

„Доколку се применуваат закони што се косат со уставите на ентитетите, како што е случајот овде, се создава правен хаос“, истакна адвокатот.

Дополнително, Бубиќ постави прашања околу легитимноста на самото назначување на Шмит, нагласувајќи дека обвинителството не доставило валиден доказ за неговото именување во текот на првостепената постапка.

„Ако кривичната постапка го засега нечиј легитимитет, тогаш тоа прашање мора да биде испитано и поткрепено со докази“, рече тој.

Апелацискиот совет го одби барањето на одбраната за изземање на двајца членови на Советот, при што претседавачката Весна Јесенковиќ оцени дека барањето е неосновано.

Од друга страна, обвинителството побара построга казна за Додик, вклучувајќи подолг затвор и мерка за безбедност.

Првостепената пресуда против Милорад Додик беше изречена на 26 февруари, при што тој беше прогласен за виновен за непочитување на одлуките на високиот претставник и осуден на една година затвор, како и шестгодишна забрана за вршење на јавна функција. Обвинетиот Милош Лукиќ беше ослободен.