ОД САБОТА НОВИ АВИОЛИНИИ ОД СКОПЈЕ ДО БАРСЕЛОНА И ЛИОН, СЕ ПЛАНИРА И ДУБАИ Ќе има и бесплатни билети преку наградна игра
Првиот лет кон Барселона е закажан за сабота, 3 мај, со поаѓање во 18:50 часот. Во чест на враќањето на линијата, двајца патници ќе добијат бесплатни авиобилети преку наградна игра на социјалните мрежи.
По тригодишна пауза, од 3 мај повторно се воспоставува директна авионска врска меѓу Скопје и Барселона, а истовремено Меѓународниот аеродром Скопје првпат ќе биде поврзан и со Лион. Летовите ќе ги извршува авиокомпанијата „Виз Ер“, со финансиска поддршка од Владата на Република Северна Македонија.
Како што беше соопштено на денешната прес-конференција на ТАВ Македонија и „Виз Ер“, линијата Скопје – Барселона ќе оперира двапати неделно, во вторник и сабота, додека летовите кон Лион ќе се реализираат трипати неделно – во вторник, четврток и сабота.
Првиот лет кон Барселона е закажан за сабота, 3 мај, со поаѓање во 18:50 часот. Во чест на враќањето на линијата, двајца патници ќе добијат бесплатни авиобилети преку наградна игра на социјалните мрежи.
„По тригодишна пауза, повторно ги поврзуваме Скопје и Барселона по воздушен пат. Враќањето на оваа линија е резултат на заедничка визија, соработка и силна заложба од страна на нашите партнери – Владата и Виз Ер“, изјави Неџат Курт, генерален директор на ТАВ Македонија.
Курт нагласи дека воспоставувањето на линијата кон Лион е особено значајно, имајќи предвид дека станува збор за град под заштита на УНЕСКО и родно место на кинематографијата, познат и по својата богата гастрономска понуда.
Дополнително, беше најавено проширување на мрежата на дестинации од Скопје, со воведување на линии кон шпанското и италијанското крајбрежје, враќање на летот кон Ларнака (Кипар), како и воспоставување директни линии кон Прага и Мадрид.
Во врска со најавениот лет Скопје – Дубаи, кој требаше да започне крајот на март под оперирање на „Флајдубаи“, беше информирано дека неговото започнување е одложено за есенва со финансиска поддршка од Владата.
Раководството на ТАВ Македонија очекува дополнителен раст на бројот на патници, поттикнат од најавеното олеснување на визниот режим од страна на Владата.
