ОД ЛИЗГАЛИШТЕ ДО АУКЦИЈА – Комбинезонот на Јута Лирдам продаден за 195.000 евра

Холандската ѕвезда во брзо лизгање, Јута Лирдам, стана центар на внимание на Зимските олимписки игри во Италија, а сега нејзиниот комбинезон, во кој ја освои златната медалја, стана вистински хит на аукција.

Комбинезонот на 27-годишната лизгачка, во кој Лирдам освои злато на 1.000 метри и сребро на 500 метри, беше продаден за импресивни 195.000 евра.

Аукцијата беше полна драма и неизвесност. Само еден час пред крајот, највисоката понуда изнесуваше нешто над 9.000 евра. Но, потоа двајца колеги-понудувачи влегоа во жестока битка, што резултираше со конечна сума која ги надмина сите очекувања.

Комбинезонот привлече внимание уште за време на Игрите, кога Лирдам по победата го откопча патентот и покажа спортски градник од нејзиниот спонзор, Најк. Овој момент предизвика дебата за границата меѓу маркетингот и строгите олимписки правила, бидејќи приватните спонзори не смеат да се рекламираат на официјална олимписка опрема.

Експертот за маркетинг, Фредерик де Лаат, процени дека Лирдам можела да заработи околу 850.000 евра од тој вирален момент, што ја покажува моќта на медиумското внимание.

Облеките на нејзината соиграчка Фемке Кок (злато на 500 метри) и Антоанета Рипма де Јонг (злато на 1.500 метри) исто така беа продадени преку платформата „MatchWornShirt“. Сепак, комбинезонот на Лирдам достигна највисока цена.

Сите приходи од аукцијата ќе бидат наменети за холандските спортски клубови каде што спортистите ја започнале својата кариера. Холандскиот олимписки комитет објасни дека со ова „спортистите им се заблагодаруваат на заедниците што ги поддржале, го охрабруваат развојот на нови таленти и инвестираат во идните холандски спортски херои“.

Така, златниот медал на Јута Лирдам доби и златна вредност, далеку од лизгалиштето.