НОВИОТ РУСКИ АМБАСАДОР ПРИСТИГНА – Сиљановска очекува професионално однесување
Претседателката ги прими акредитивните писма на новиот руски амбасадор, со порака за мир и соработка.
Претседателката Гордана Сиљановска-Давкова денеска ги прими акредитивните писма на новоименуваниот амбасадор на Руска Федерација, Дмитриј Зиков.
На средбата, Сиљановска-Давкова изрази уверување дека дипломатските активности на амбасадорот ќе бидат насочени кон професионално застапување на интересите на Русија и рускиот народ, во согласност со меѓународното право, соопштија од нејзиниот кабинет.
Амбасадорот Зиков истакна дека претставувањето на неговата земја во Северна Македонија претставува значајна и одговорна мисија. Тој ја нагласи подготвеноста на руската страна за отворена соработка и градење рамноправни и заемно корисни односи, со цел унапредување на просперитетот, благосостојбата и развојот.
Во таа насока, претседателката изрази надеж дека претстојниот христијански празник Велигден ќе донесе крај на војните и ќе означи почеток на нова ера на мир и благосостојба.