НОВ МУЗЕЈ ВО ПЈОНГЈАНГ Се слави братството во оружје меѓу Русија и Северна Кореја
На неодамнешната средба во Пекинг, рускиот претседател Владимир Путин изрази благодарност до Ким Џонг Ун, нарекувајќи ги севернокорејските војници „храбри борци кои доброволно се приклучиле на фронтот во Украина“.
Севернокорејскиот лидер Ким Џонг Ун започна изградба на голем воен музеј во Пјонгјанг, посветен на севернокорејските војници кои загинале борејќи се на страната на Русија во војната против Украина.
Според државната агенција KCNA, Ким лично присуствувал на свечената церемонија за поставување камен-темелник на идниот „Меморијален музеј на борбени подвизи во прекуокеански воени операции“. На настанот присуствувал и рускиот амбасадор во Северна Кореја, Александар Мацегора.
Како што се наведува, Ким лично ја избрал локацијата во областа Хвасонг, еден од симболите на современиот Пјонгјанг, и наредил формирање специјални елитни градежни единици за проектот.
Покрај музејот, Ким претходно во август најави изградба на улица „Себјол“ („Утринска ѕвезда“) во округот Тесонг, која ќе биде посветена на паднатите борци.
Јужнокорејската Национална разузнавачка служба (НИС) соопшти дека најмалку 600 севернокорејски војници загинале борејќи се заедно со руските сили, а вкупните жртви меѓу севернокорејските трупи се проценуваат на над 4.700 од почетокот на нивното учество во конфликтот минатата година.
Минатата година Северна Кореја и Русија потпишаа договор за сеопфатно стратешко партнерство, со кој се обврзаа на меѓусебна воена помош доколку некоја од нив биде нападната.
На неодамнешната средба во Пекинг, рускиот претседател Владимир Путин изрази благодарност до Ким Џонг Ун, нарекувајќи ги севернокорејските војници „храбри борци кои доброволно се приклучиле на фронтот во Украина“.
