НАТО ПОД УДАР – Трамп ги омаловажува сојузниците и нивните жртви

Сојузниците на НАТО се огорчени поради најновите критики на Доналд Трамп кон алијансата и нејзините членки. Во интервју за „Фокс њуз“, Трамп повтори дека според него НАТО нема да ги поддржи САД доколку е потребно.

„Никогаш не ни требаа. Ќе кажат дека испратиле некои војници во Авганистан и останале малку подалеку од фронтовската линија“, изјави Трамп.

Тој додава дека САД биле „многу добри кон Европа и други земји“ и дека поддршката мора да биде двонасочна.

Тој ги омаловажи и американските сојузници, тврдејќи дека нивните војници „останале подалеку од фронтот“ за време на борбите против Талибанците, игнорирајќи дека Член 5 од НАТО, кој предвидува дека напад врз една членка е напад врз сите, бил активиран по нападот на 11 септември. Тогаш земјите-членки распоредиле илјадници војници во Авганистан, при што повеќе од илјада неамерикански припадници на НАТО загинале.

Коментарите на Трамп веројатно ќе ги зголемат тензиите меѓу САД и нивните сојузници, оценува британскиот „Гардијан“.