НАРОДОТ СЕ КРЕНА – Илјадници на улиците на Париз против власта

Во Франција денеска се одржаа стотици собири на незадоволни граѓани, а еден од најголемите протести се случи пред Северната железничка станица во Париз. Таму се собраа неколку илјади луѓе, претежно млади левичари, кои гласно протестираа против владата и побараа оставка од претседателот Емануел Макрон.

Под силно полициско обезбедување, демонстрантите пееја револуционерни песни и носеа транспаренти со пораки: „Народот се крена“ и „Парите за учење, а не за бомбардирање“.

Некои од порадикалните пароли предизвикаа и сериозни реакции, особено оние што повикуваа на насилство. Полицијата на моменти употреби солзавец, вклучително и пред неколку средни училишта во 20-от арондисман.

Од Северната станица колоната се упати кон плоштадот Шатле, каде што беше најавено масовно продолжение на протестот.