МУЗИКА ЗА ЧИСТ ВОЗДУХ – Осумчасовна блокада на Усје
Настанот ќе трае од 15 до 23 часот и ќе го блокира влезот на цементарницата „Усје“.
Иницијативата „Стоп за Усје“ утре ќе организира осумчасовна блокада пред цементарницата „Усје“ во Скопје. Настанот, наречен „Блокадафест“, ќе трае од 15 до 23 часот и ќе го блокира влезот на фабриката.
Организаторите истакнуваат дека ова „не е само блокада, туку и гласен и креативен отпор против загадувањето кое продолжува“.
Настанот ќе биде придружен со музички сетови и настапи на артисти кои својот протест го изразуваат преку музиката. Во поддршка на акцијата ќе настапат: DJ Александар Јорданов, DJ Chvare, DJ Andrew Meller, ‘Новиот почеток’, ‘Хајка’, ‘Луфтанза’, ‘Животни’, ‘Големата вода’, DJ Базел, DJ Emily Nas, Дина Јашари, Член 16, Зарина Првасевда и ‘Корка’.
Организаторите нагласуваат дека нивната поддршка покажува дека ова е заедничка борба за право на чист воздух, а не изолиран протест.
„Блокадафест“ е и порака до институциите и до компанијата „Титан Усје“ дека здравјето на граѓаните не е преговарачка категорија. Блокадата е само еден од низата протести што иницијативата „Стоп за Усје“ ги организира во последниот период против аерозагадувањето во Скопје, кое го лоцираат главно во цементарницата „Усје“.
