МОСКВА, ДЕЈТОН И БиХ Цвијановиќ со силни пораки од Белград

Српската членка и претседавач со Претседателството на Босна и Херцеговина, Жељка Цвијановиќ, изјави дека е од суштинско значење учеството на претседателот на Република Српска, Милорад Додик, на безбедносниот состанок во Москва, нагласувајќи дека сè повеќе луѓе ја разбираат суштината на „среќната приказна“ за Босна и Херцеговина и за Република Српска.

„Босна и Херцеговина е погрешно претставена три децении. Лагите беа прикажувани како вистини, додека оние што го бранеа Дејтонскиот мировен договор беа обвинувани за негово уривање. Вистинските бранители на уставот беа етикетирани како сепаратисти. Сето тоа е невистина – рече Цвијановиќ во интервју за РТС.

Таа посочи дека БиХ се соочува со сериозни потешкотии во функционирањето, при што тројцата членови на Претседателството претставуваат најасен показател за длабоките политички и етнички разлики.

Во врска со меѓународната заедница, Цвијановиќ сподели дека за време на нејзината посета на САД, одредени соговорници изразиле став дека сите кои не го почитуваат Дејтонскиот договор треба да бидат санкционирани. Но, според неа, многумина од нив не биле информирани за ситуацијата во која, како што рече, Кристијан Шмит, кого Република Српска не го признава за висок претставник, „наметнал закон за прогон на претседателот Додик и ги променил изборните правила“.

„Ние не се бориме против Дејтон, туку против неговото искривување и узурпацијата на надлежности од страна на неовластени странски бирократи. Тие сметаат дека можат да бидат над парламентот и владата, да располагаат со нашите ресурси без никаква одговорност. Тоа е неприфатливо во 2025 година“ – потенцираше Цвијановиќ.

Таа додаде дека Република Српска води отворена надворешна политика и се стреми кон воспоставување и обновување на добри односи со сите релевантни партнери – од земјите од Заливот и арапскиот свет, до САД, Европа и регионот.

Осврнувајќи се на состојбите во Европа, Цвијановиќ оцени дека постои тренд на „откажување“, при што, како што рече, луѓето се изолираат, им се забрануваат партии или се соочуваат со притисоци доколку не можат да победат на избори.

„Кога потпретседателот на САД укажува на вакви појави, јас тоа го разбирам – затоа што и ние сме под постојан притисок и напад врз нашите уставни надлежности – изјави Цвијановиќ.

Таа заврши со апел дека политичките претставници на Република Српска мора да продолжат со дијалог со сите страни и да се борат за институционалните права на ентитетот во рамките на Дејтонскиот договор.