МИОВСКИ ВО ПРЕСРЕТ НА КВАЛИФИКАЦИСКИОТ НАТПРЕВАР ПРОТИВ БЕЛГИЈА – „Свесни сме против кого играме, но покажавме дека знаеме да играме фудбал“

Напаѓачот на македонската репрезентација, Бојан Миовски, изјави дека тимот со голема самодоверба влегува во последната фаза од квалификациите, каде Македонија моментално е прва во групата со гол-разлика 11:2.

„Знаеме против каква репрезентација играме и свесни сме дека сме во завршница од квалификациите. Покажавме дека знаеме да играме фудбал и затоа сме тука. Работата не е завршена, но горди сме на тоа што сме први во групата“, изјави Миовски.

Тој додаде дека натпреварите против Белгија, а потоа и против Казахстан и Велс, се меѓу најважните во поновата историја на репрезентацијата.

„Белгија е одличен тим со играчи од топ лигите, но ние играме како колектив и тоа го докажавме. Ќе имаме силна поддршка од навивачите и верувам дека ќе гледаат одличен фудбал“, рече Миовски.

Македонија гостува кај Белгија во петок (20:45 ч.) во Гент, а во понеделник го пречекува Казахстан во Скопје.