МИЦКОСКИ ГО НАРЕКУВА ИСТОРИСКИ – Охридскиот аеродром наскоро ќе блесне

Почна големата реконструкција на аеродромот „Св. Апостол Павле“ во Охрид, чиј завршеток е предвиден до крајот на мај. Проектот ќе обезбеди 4.500 м² нов функционален простор, со цел подобрување на условите за патниците и условите за работа на персоналот, граничната полиција и царинската управа.

Премиерот Христијан Мицкоски ја оцени реконструкцијата како историски момент за Охрид, охридското крајбрежје и околните општини. Тој нагласи дека зголемен е капацитетот и квалитетот на аеродромот, а во првите два месеци од годинава бројот на патници на скопскиот аеродром пораснал за 30%, а на охридскиот за околу 20%. Мицкоски додаде дека се очекува двоцифрен раст на патници и дека се водат разговори со тур-оператори за организирани посети, кои надвор од сезоната би донеле околу половина милион ноќевања.

Вицепремиерот и министер за транспорт, Александар Николоски, изрази надеж дека реконструираниот дел ќе биде отворен во јули. Тој посочи дека проектот додава 2.500 м² повеќе од постојниот простор, овозможувајќи поголем број патници, попријатно искуство и зголемување на туризмот и бизнис поврзаноста.

Генералниот директор на ТАВ Македонија, Неџат Курт, истакна дека аеродромот ќе продолжи со нормално функционирање за време на градежните работи. Инвестицијата од 2,7 милиони евра опфаќа проширување на патничкиот терминал, шалтерите за регистрација, зоната за безбедносна контрола, административната зграда, нов ресторан, канцеларии за граничната полиција и царинската управа, како и паркинг за вработените.

Курт нагласи дека Охрид, како срце на македонскиот туризам, ќе добие модернизиран аеродром кој ќе го пречекува зголемениот број гости.