МАСЕРАТИ ВО КРИЗА Само 11 работни денови во 6 месеци, работниците одбиваат трансфер во Крагуевац

Италијанскиот автомобилски симбол, фабриката на Maserati во Модена, бележи историски застој – во првата половина од 2025 година, работниците биле ангажирани само 11 дена. Според синдикатот FIM-CISL, произведени се само 45 возила, додека останатото време вработените го поминале на платено отсуство (cassa integrazione) со месечни примања од околу 1.200 евра.

Како привремено решение, концернот Stellantis предложи дел од работниците да бидат прераспределени во Крагуевац, Србија, каде започнува сериско производство на новиот Fiat Grande Panda. Понудата вклучува нето плата од 1.700 евра, месечен бонус од 1.000 евра, платен сместување и исхрана, дневница од 25 евра, како и повраток дома на секои 45 дена.

Но, синдикатот FIOM Modena категорично ја одби иницијативата, нарекувајќи ја „понижувачка и неприфатлива“. Работниците јасно истакнаа дека не се подготвени да ги напуштат своите семејства и градови за привремена заработка. „Не одам во Србија. Не дозволувам да ме избркаат од мојот град. Мојот живот е тука“, изјави еден од работниците за Gazzetta di Modena.

До денот на објавување на веста, ниту еден работник не ја прифатил понудата за трансфер.

Иако фабриката во Крагуевац станува сè поважна точка во европската стратегија на Stellantis, случајот со Maserati покажува колку е тешко да се балансираат економските интереси со човечките животи и достоинство.

Maserati, некогашен синоним за италијанска елеганција и автомобилска традиција, денес се соочува со длабока криза. Моденската фабрика е симболично и реално во ќорсокак – минимално производство, неуспешен обид за релокација и неизвесна иднина. Крагуевац можеби е дел од стратегијата за опстанок, но пораката од работниците е јасна – потребно е повеќе од финансиски стимулации за да се надмине кризата.