МАКЕДОНИЈА СТАНУВА ГОЛЕМО ГРАДИЛИШТЕ Ќе нѐ мерите по завршени километри, не по потрошени зборови вели Меџити

Во своето обраќање на денешната церемонија, првиот вицепремиер на Македонија, Изет Меџити, истакна дека Владата е посветена на реализација на инфраструктурни проекти кои ќе ја подобрат транспортната мрежа и економската поврзаност на земјата. Тој нагласи дека денес Македонија не снима рекламни спотови, туку гради патишта за иднината.

„Ништо не се градеше претходно. Денес, околу нас не се фотообјективи, туку се слушаат звуците на булдожери, багери и камиони. Градиме патишта кои ќе обезбедат подобри услови за живот и ќе ја доведат Европа на Балканот, а Балканот – во Европа,“ рече Меџити.

Првиот вицепремиер го истакна важниот проект на изградба на Коридорот 8, кој, како што посочи, претставува повеќе од само пат – тоа е европска артерија која ги поврзува Јадранот и Црното Море. Со завршувањето на оваа делница, Македонија ќе стане важен транзитен коридор за целиот Балкан.

„Со почетокот на изградбата на овој автопат, Полошкиот регион ќе стане раскрсница на можности и инвестиции. Ќе го скратиме патот меѓу Скопје, Охрид и Струга и ќе ги приближиме пограничните региони кон нашите домаќинства и бизниси,“ истакна Меџити.

Тој се заблагодари за континуираната поддршка од амбасадорката на САД, г-ѓа Ангела Агелер, и истакна дека партнерството со Соединетите Американски Држави е вистински пример за соработка која е видлива и на терен, а не само на хартија.

„Без експертизата на тимот на БехтелЕнка и на Јавното претпријатие за државни патишта, оваа визија немаше да стане реалност. Градиме доверба, не само автопат. Инвестираме во локалната инфраструктура, како што се улиците, канализациски и водоводни мрежи, училишта и амбуланти,“ додаде Меџити.

Со завршувањето на оваа година, Македонија се претвора во големо градилиште, рече тој, додавајќи дека каде и да се оди во земјата, наидува на сигнализација за градилишта. Меџити нагласи дека ова не е случајност, туку резултат на долгорочен план.

„Ова е само еден од многуте проекти. Секој нов километар пат, секоја нова инвестиција и секој спасен живот поради побезбедните патишта ќе ја донесат Македонија поблиску до европските стандарди,“ заклучи Меџити, додавајќи дека вистинската вредност на проектите ќе се мери во резултати, а не во зборови.

На крајот, вицепремиерот вети дека Владата ќе биде оценувана според завршените километри патишта, а не според потрошените зборови.