КАТАРСКИОТ ПРЕМИЕР АЛ ТАНИ „Време е Израел да биде казнет за злосторствата“

Премиерот на Катар, Шеик Мохамед бин Абдулрахман Ал Тани, остро ја осуди израелската авијација по нападот во главниот град Доха на 9 септември, кога беше погодена зграда со цел ликвидација на лидерите на палестинското движење Хамас од Газа.

Иако израелската операција не успеа да ги елиминира целите, во нападот загинаа пет пониски функционери на Хамас, како и еден припадник на катарските безбедносни сили.

Нападот предизвика силна реакција и широка осуда низ арапскиот свет, вклучително и од богатите заливски монархии – традиционални сојузници на Соединетите Американски Држави.

„Дојде време меѓународната заедница да ги прекине двојните стандарди и конечно да го казни Израел за сите злосторства што ги изврши,“ изјави Ал Тани пред состанокот на арапските и муслиманските лидери во Доха.

Тој додаде дека „Израел мора да знае дека војната на истребување на која е изложен нашиот братски палестински народ, чија цел е да го протера, нема да успее“.

Состанокот на лидерите во понеделник во Доха беше опишан од домаќинот како доказ за „широката арапска и исламска солидарност со државата Катар во услови на кукавичка агресија на Израел“ и како „категорично отфрлање на државниот тероризам што го спроведува Израел“.