ИСТОРИСКА СРЕДБА ПО 25 ГОДИНИ Трамп се сретна со сирискиот претседател ал-Шара во Ријад
Во саудискиот главен град Ријад се одржа прва средба по 25 години меѓу американски и сириски претседател, непосредно пред најавените разговори меѓу Доналд Трамп и лидерите на земјите од Заливот.
Оваа средба доаѓа еден ден по објавата на Трамп дека ќе ги укине американските санкции против Дамаск, воведени поради злосторствата на режимот на Башар ал-Асад во 2011 година. Трамп, кој ја започна својата турнеја низ Заливот, изјави дека укинувањето на санкциите е „шанса за земја разурната од војна да блесне“.
Според соопштението од Белата куќа, Трамп „се согласил да го поздрави сирискиот претседател“ ал-Шара – поранешен бунтовнички лидер, кој по соборувањето на Асад беше назначен за привремен претседател на Сирија.
Ал-Шара се дистанцирал од радикалните групи како Ал Каеда и Исламската држава, но и натаму се наоѓа на терористичките листи на САД и ЕУ, што фрла сенка врз легитимитетот на средбата.
Исто така, турската агенција Анадолија објави дека Трамп и ал-Шара одржале онлајн конференција со турскиот претседател Реџеп Таип Ердоган и саудискиот престолонаследник Мохамед бин Салман. Деталите од разговорите сè уште не се обелоденети.
Последна ваква средба меѓу американски и сириски лидери се случила во 2000 година, кога Бил Клинтон се сретнал со Хафез ал-Асад, таткото на Башар. Новата ера на дијалог меѓу Вашингтон и Дамаск би можела да има длабоки геополитички импликации, особено во контекст на повторното позиционирање на Сирија на Блискиот Исток.
