ИМАМОГЛУ ОСУДЕН НА ЗАТВОР Политичкиот ривал на Ердоган пред најголем предизвик во кариерата

Градоначалникот на Истанбул и водечки опозициски политичар, Екрем Имамоглу, е осуден на вкупно една година и осум месеци затвор поради „јавна навреда“ и „закана“ кон обвинител при вршење на службени должности, пренесува CNN Türk. Оваа пресуда се надоврзува на правните притисоци со кои се соочува Имамоглу откако стана еден од најсилните ривали на претседателот Реџеп Таип Ердоган.

Судот го прогласи Имамоглу за виновен по две точки: една година, пет месеци и 15 дена затвор за навреда на обвинителот Акн Гурлек, и дополнителни два месеца и 15 дена за закана. Обвинението за поттикнување против учесници во борбата против тероризмот беше отфрлено. Иако пресудата не е конечна, таа веќе има сериозни политички импликации.

Имамоглу беше уапсен на 19 март под обвиненија за корупција, а по одлука на судот, на 23 март му беше продолжен притворот. Само неколку дена подоцна, Градскиот совет на Истанбул го суспендираше од функцијата. На рочиштето присуствуваа неговиот адвокат, лидерот на Републиканската народна партија (CHP) Озгур Озел, бројни пратеници, локални функционери и неговата сопруга.

И покрај правните проблеми, CHP го прогласи Имамоглу за свој официјален кандидат за претседателските избори во 2028 година. Сепак, дополнителен удар за неговата политичка иднина е анулирањето на неговата универзитетска диплома, што може да ја доведе во прашање неговата законска способност за кандидатура.

Апсењето на Имамоглу предизвика масовни протести низ Турција, кои се оценуваат како најголеми од антивладините демонстрации во 2013 година. Поддржувачите го гледаат како симбол на демократски отпор, додека критичарите на власта обвинуваат дека правосудниот систем се користи како политичка алатка.

Пресудата и случувањата околу Имамоглу повторно го отворија прашањето за владеењето на правото, слободата на изразување и политичкиот плурализам во Турција, особено во пресрет на клучните изборни процеси кои следуваат.